आपल्यासाठी कुठे गालीचे होते ?

आपल्यासाठी कुठे गालीचे होते ?
त्याचसाठी तर म्हणे बाकीचे होते !  

तू सुखा येऊ नको माझ्या वाटेला 
दु:खं हे माझे उभ्या जन्मीचे होते ! 

कोण मी होतो मला माहीतच नव्हते 
कोणते नाते मला खात्रीचे होते ? 

कोणत्या होत्या दिशा माझ्या सोयीच्या ? 
कोणते वारे मला सोयीचे होते ? 

विसरलो मीही कसा हक्काच्या ओळी ?
विसरलो मी वाक्य जे टाळीचे होते ! 

रात्र अंधारी तरी सूर्याशी बोलू
वाटले केव्हा तरी रात्रीचे होते ! 

भेट होण्याची जराही खात्री नाही
गूढ हे माझ्या तुझ्या भेटीचे होते ! 

वाटते भीती अता साऱ्या नात्यांची 
काय आजोबा तरी नातीचे होते ? 

...देवीदास हरिश्चंद्र पाटील 
२९.०८.२०२४ रात्रौ २३.४९